ایران  کے سپریم لیڈر آیت اللہ علی خامنہ ای حملے میں جاں بحق

ایران کی سیاسی اور مذہبی قیادت سے متعلق ہفتے کے روز سامنے آنے والی خبروں نے دنیا بھر میں ہلچل مچا دی ہے۔ ایرانی سرکاری ذرائع ابلاغ کے مطابق ملک کے سپریم لیڈر آیت اللہ علی خامنہ ای ایک بڑے حملے میں جاں بحق ہو گئے۔ یہ حملہ ایسے وقت میں کیا گیا جب خطے میں پہلے ہی کشیدگی عروج پر تھی اور ایران، امریکہ اور اسرائیل کے درمیان تعلقات انتہائی تناؤ کا شکار تھے

ایرانی سرکاری میڈیا نے اتوار کی صبح آیت اللہ خامنہ ای کے انتقال کی تصدیق کی اور اعلان کیا کہ ملک میں چالیس روزہ سوگ منایا جائے گا جبکہ سات دن کی سرکاری تعطیلات بھی دی جائیں گی۔ سرکاری بیان میں کہا گیا کہ یہ حملہ ہفتے کی علی الصبح کیا گیا، جسے ایران نے بزدلانہ کارروائی قرار دیا ہے ایرانی حکام کا کہنا ہے کہ سپریم لیڈر اپنے معمول کے فرائض انجام دے رہے تھے اور اپنے دفتر میں موجود تھے جب انہیں نشانہ بنایا گیا

ایران کی پاسدارانِ انقلاب نے اپنے بیان میں آیت اللہ خامنہ ای کو ایک عظیم رہنما قرار دیتے ہوئے کہا کہ قوم ایک ایسے قائد سے محروم ہو گئی ہے جو روحانی پاکیزگی، مضبوط ایمان اور جرات کی علامت تھے۔ بیان میں مزید کہا گیا کہ اس حملے کا سخت اور فیصلہ کن جواب دیا جائے گا اور ذمہ داروں کو عبرتناک سزا دی جائے گی

دوسری جانب امریکی صدر ڈونلڈ ٹرمپ نے کہا کہ یہ کارروائی ایران کے جوہری پروگرام اور خطے میں اس کے کردار کے خلاف ایک اہم قدم ہے۔ ان کا کہنا تھا کہ حملوں کا مقصد ایران کو جوہری ہتھیار حاصل کرنے سے روکنا اور مشرق وسطیٰ میں امن قائم کرنا ہے

عالمی برادری میں تشویش،فوری جنگ بندی کی اپیل

انہوں نے یہ بھی دعویٰ کیا کہ امریکی اور اسرائیلی حکام نے مل کر اس کارروائی کی منصوبہ بندی کی اور ہدف کے بارے میں مکمل معلومات موجود تھیں

اسرائیلی وزیر اعظم بنیامین نیتن یاہو نے کہا کہ سپریم لیڈر کے رہائشی کمپاؤنڈ کو تباہ کر دیا گیا ہے۔ غیر ملکی ذرائع کے مطابق حملوں میں ایران کے بعض اعلیٰ فوجی عہدیدار بھی مارے گئے، جن میں وزیر دفاع اور پاسداران انقلاب کے اہم کمانڈر شامل ہیں۔ تاہم ایران کی جانب سے ان تمام اطلاعات کی مکمل تفصیلات فوری طور پر جاری نہیں کی گئیں

ایران نے ان حملوں کو بلا اشتعال اور غیر قانونی قرار دیتے ہوئے ردعمل میں اسرائیل اور خطے میں موجود امریکی اڈوں کی جانب میزائل داغنے کا دعویٰ کیا ہے۔ اطلاعات کے مطابق خلیجی ممالک میں موجود بعض امریکی تنصیبات کو بھی نشانہ بنایا گیا۔ اس صورتحال کے بعد پورے خطے میں ہائی الرٹ جاری کر دیا گیا ہے

اقوام متحدہ کی سلامتی کونسل کے اجلاس میں روس اور چین نے حملوں پر شدید تنقید کی اور کہا کہ جب ایران اور امریکہ کے درمیان مذاکرات جاری تھے تو اس قسم کی کارروائی خطے کو مزید عدم استحکام کی طرف دھکیل سکتی ہے۔ اقوام متحدہ کے سیکریٹری جنرل انتونیو گوتریس نے فوری جنگ بندی اور تحمل کا مظاہرہ کرنے کی اپیل کی ہے

تجزیہ کاروں کے مطابق یہ واقعہ مشرق وسطیٰ کی سیاست میں ایک بڑا موڑ ثابت ہو سکتا ہے۔ ایران میں اندرونی سیاسی صورتحال بھی تبدیل ہو سکتی ہے اور قیادت کے حوالے سے اہم فیصلے متوقع ہیں۔ عالمی برادری اس وقت شدید تشویش میں مبتلا ہے اور سب کی نظریں اس بات پر مرکوز ہیں کہ آنے والے دنوں میں حالات کس سمت اختیار کرتے ہیں